Somalia:Moderate Islamists declare Jihad against Al-Shabab By Alasow Clickhere

Somalia:People supports government in rallies By Alasow Clickhere

Weerarka Warbaahinta iyo Prof Ibi & Weled Cabdalle

Mogadishu 12 March 2009 Waagacusub Media
Dadow ragax soo dhahaay rag iyo dumar soo shiraay haduu rabash taagan yahay riwaayadan bal ila arkaay. Oday beeldaaje ah oo u talin jiray beel degta gobolladda dhexe ayaa reerkisii saddex beelood oo daris wadaag ay yihiin midba dhinac kasoo weerartay, sidii dhaqanka Soomalidu ahaa duqowdii beeshaas baa talo isagu timid si colaadda oogan loo xalliyo, suldaankii reerka u waynaa ayaa la yiri tali markaas buu wuxuu yiri ”waxaan rabaa dhowr wiil oon u duceeyo oo halka irid oo noo furan soo xirta .“ Sidaas ayaa reerkii talo ku qaatay oo iridii u furayd reerkii deganaa ayey rag ka soo dileen. Tusaalahaa waxaa u eg weerarka Prof Ibbi ku qaadey saxaafadda xorta ah waayo dowladani dalka guud ahaan iska daayee degmooyinka Xamar ma wada xukunto walina ma saldhigan, awoodda kali ah oo ay leedahay waa afkaartooda oo warbaahintu suuq geyso, ayaandarro jaalle Ibi ayaa durbadiiba colaad dhex dhigay dowlada taagta yar iyo afmaal (Suugaanley & Qalinley)

Somalia:Al-Shabab claims Mogadishu blast, boycotts Sharia-based cabinet.  12.03.09 Clickhere
 

Warka Ibi ku andacooday ee ahaa saxaafadda sida hoggaamiye kooxeedyadii oo kale ha loola diriro marka miisaanka qanuuniga la saaro waa fal dambiyeed uu maxkamad ku mutaysanayo, waayo dastuurka xukuumada ayaa qaba in saxaafaddu xor tahay, markii xeer hoosaadka saxaafadda la ansixiyo ayaa shaqsigii ama hay’adi danbi gasha maxkamad la soo taagaya. Hase yeeshee qanuunka dowliga ahi ma qabo wadar u ciqaabid sidaas darted, Ibi wuxuu garab marsan yahay dastuurka dowladda uu xilka u hayo ama xubin ka yahay. Walow aan Ibi u aqaan nin nabadeed oon ka kalluumaysan dhiiga dadka, doorkisa siyaasadeedna yahay galaangal iyo ruma rumeeye aan ka dheeran xafiisyadda madaxda sare, haddana waxaan la yaabay war culeyskaas leh inuu ku tanaagoodo oo ku dhiirado sidii hogaamiye kooxeedyadii ha loola diriro, waxay u dhigmaysaa dilka iyo dhabar ka wareenka sannadahaan ku socday bahda warbaahinta halla sii kordhiyo, sidaas darteed warka Ibi diintana waa ku gef, maxaa yeelay Nabigeenii suubana nabadgalyo iyo naxariis korkiisa ha ahaate wuxuu xadiis ku yiri ”fitnadu waa hurudaa nacladi ha ku dhacdo qofkii huradada ka kiciya”.

Cumar C/rashiid iyo Sheekh Shariif haddii ay garanayaan weerar lagu qaaday saxaafadda inay tahay tikidh ay u goosteen fashilkoodii siyaaso, isla habeenkii bay Ibi ku soo rogi lahaayeen ciqaab anshaxeed iyaguna subaxii xigtay shir jaraa’id oo raalligalin ah bey qaban lahaayeen, waayo hay’adaha caalamiga ah ee deeqaha bixiya dowlad aan xorriyada saxaafada ogolayn ma taageeran, aqoonsi rasmi ahna ma siiyaan, waxayse arintu u muuqataa oohintu orgiga ka wayn oo hadalka Ibi wuxuu daba socdaa oo lagu taageeray hadalkii ergayga qaramadda midoobay Soomaliya u qaabilsan Axmed Weled Cabdalle oo ah mu’alifka dowladda Sharifeyn oo dhowaan yiri ”saxaafadda Soomalida buunbuunisa xasuuqa aan ciidammada AMISOM sameyn” hadalkaasoo ku soo beegmay maalin tacsiyeed afartan qof ay ciidammada AMISOM ku dileen wadada Maka Al Mukarama. Sida laga dheehan karo hadalka Ibi waa qandaraas daba socda hadalkii Axmed Weled Cabdalle tiiyoo ay wehliso webka Hiiraan oo isna maalin kadib soo qoray halla kala diro odayaasha Hawiye hana lagu baddelo bulshada rayidkaa, sidaas darted durbaanka la garaacayo n uxurkiisu waa waa yaan la helin ummaddan la dulmay cid u hadasha oo waraabaha yur ka tiraah.

Abwaan Mustafa Sheekh Cilmi ayaa xilligii dowladii Carte lasoo dhisay isagoo la hadlaya saxaafdda wuxuu yiri ”dowladaani waa cowro waayo kursi ma dhaxlin, nidaam ka horreeyay ma dhaxlin, wuxuuna talo kusoo jeediyey cowro lama faydee waa la asturaa ee saaxafadey yaan la faydin.” Hadda Ibiyow kali ah waxaa mucaaradnimo kugu filan iyadoon xabbad lagugu ridin in saxaafaddu kashifto inta qodob ee axdiga laga jabiyey dadka loo iftiimiyo mudadii sharciga ahayd ee baarlamanku inay ku egtahay Setembar 2009 si axdiga gees marsanna in loo kordhiyey waqtiga, doorashaduna u dhacday musuq la maldahay isla markaana magaca dowladu aad sheegataan in uusan dastuurka ku caddayn, waayo dastuurku wuxuu qorayaa dowlada federaalka Somaaliya, balse waxaad sheegataan dolwada midnimo qaran o aanla aqoon meel magacaas laga soo minguuriyey. Dhan kale ka eego dhowrkii todobaad ee aad jirteen qaladaadka yar yar ee dhacay waxaa ka mid ah: madaxwayne ka hadlaya awoodii baarlamanku lahaa ama howshii fulintee raysul wasaaruhu lahaa, wasiiro nin waliba xayndaabkiisi maamul dhaafay oo adiga Ibi ahi aad kow ka tahay. Runtii waxaad la mid tihin nin guri muraayad ah deggan oo dhagxaan tuuraya, sababtoo ah howsha aad faraha ku haysaan in sidii ukuntii loo dhowro bay u baahan tahaye in cadow cusub loo abuuro ma rabto. Haddii saxaafaddu liddi kugu tahay oo ceebahaaga faagfaagto waa lagu yaabaa oo horaa Salaan Carrabey u yiri ”afku wuxuu la xoog yahay magliga xowda kaa jara” Adigaa ka taliyee hadda suugii mucaardka sarbeebta saxaafada ku darso.

Prof Ibi weligi wuxuu ku hawanaa caburinta saxaafadda. Waagii Carte waxaa dhacay rag Ibi hogaaminayo ayaa baarlamanka geeyay xeer hoosaad lagu caburinayo saxaafadda markii ergo aan ka mid ahaa oo saaxaafada ka socotay golihii wasiirada iyo xubno baarlamanka ah ay arrintaasi kala doodeen ee taladii wanaagsanayd la diiday oo baarlamankii si aan masuuliyad xambaarsanyn u ansixiyey sharcigii ayaa saxaafadii xilligaas jirtay waxay go’aansadeen in war dowladaas ku saabsan aan la sii dayn hal maalin oo shaqo joojin ahna la sameeyo. Dowladii berigaas jirtey goortey saddex maalmood adkaysan waysay waxaa la soo diray ergo uu hor kacayey Cabdikariin Axmed Cali oo ahaa wasiirka baarlamanka waxaana heshiis lagu gaarey in madaxwaynuhu sharcigaas dib ugu celiyo baarlamanka uusana saxiixin saxaafaduna ay cunaqabataynta ka qaado dowladda. Shaqsiyan walow meherada saxaafada aanan lix sano ka shaqayn qorshahana aysan iigu jirin inaan mustaqbalka ka shaqeeyo hadana geesiyaasha hadda shaqada gacanta ku haya waxaan kula talin lahaa in aysan dowlada cunaqabatayn waayo warka Ibi ma ahan go’aan wasiiro iyo baarlaman ka soo baxay, laakiin isaga Ibi ah waa in saxaafadu cunaqabatayn ku soo rogto oon wax war ah oo uu leehayay la sii dayn inta laga helayo nidaam u kala garsoora isaga iyo saxaafadda.

Soomalidu waxay ku mahmaahda “Sadar muuqda su’aal ka dhan” doorka suxufiga warbaahinta iyo bahda afmaalku bulshada ku leedahay ama halgankii gumaysi Itoobiya ee dalka qabsdey lagula diriray ay ku lahaayeen ma ahan mid sharaxaad aniga iiga baahan balse sida caadadu Soomalidu tahay halgan kasta waxaa la xaqiraa oo masraxa laga saara udub dhexaadkii dhaliyey waxaana la abaalmariyaa kuwii gumaysiga u heesay ama xaqa iyo baadil isku barxay. Sidaa darteed billadii dahabiga ahayd ee saxaafdu filaysay ayaa Ibi siiyey taasoo ah in la weeraro waxaanse ragga meherada gacanta ku haya dhihi lahaa Alle iyo inta wax garata garoowshiiyo ka suga warka Ibina sidii C/laahi Fiidow dhaha ”kulayl iyo qabow midna naguma hayo” shirqolladda maleeganna iyo khataraha soo socda wadajir ugu tabaabushaysta.

Hadaad dib u eegto dareen kicintii abwaanadu ku yeeshen bulshada, bal eeg SSDF doorka siyaasiyintu qaateen iyo guubaabadii gabyaa Khaliif Sheekh Maxamud uu ku sameeyay ayaa isu dhigmay baan dhihi karaa, eeg afartaan erayadan ”nin dudumo u qaylinahayoo daalan baan ahaye” dib u eeg halgankii hubaysnaa ee gobollada dhexe ka bilowday ee aakhirkii soo gaarey caasimada doorkii uu gabyaa Saciid Gacamey ku lahaa dib u xasuuso erayadan ”hadaan nabada tiirkaan ku xiro loogu tagi wayin” ama “halgan waan ka haray oo Hawiyaan hilib wadaagnaaye” ama gabaygii Hadraawi ee ahaa ”hadaanan hadanan“ ee uu ku kiciyey dadka waqooyi ama gabaygii ama doorka ay ku yeelatay riwaayadii Land Cruiser ee Cabdi Muxumud dhabar jabinta dowladii ama gabayadii YamYam ee ahaa “ho hooy geelu maa dido” nin dhacdooyinkaas yaqaan afmaal iyo qoraa lama diriro. Dirac waa u waano doqonna yeelkeed.

Gabagabadii qormadan uma qorin sidii suxufigii Uurdoox markuu lixdameeyadii musuqmaasuqii Jeneral Maxamed Abshir sameeyay soo bandhigay ee ahaa 71 sarkaal hoose oo derajo sare loo dallacsiiyey oo uu 49 jufo hoosaadkiisa ka dhigay oo kale inaan soo bandhigayo fadeexadda uu Ibi sameeyay, umana soo qorin in nidaamkan ugub aan ku mucaarado balse ujeedkaygu waa inaan ragga Ibi u horreeyo iraahdo saxaafadu ma gablamin suxifina wali waa nool yahay ee saaxiibkay Ibiyow halla mid noqon macalinkii carrabka la’aa ee Agif yiri ee markii ardaygii Agif yiri garaacay oo ka raba inuu alif yiraa, dagaal iyo is dil jira saxaafaduna ma keenin suxufina ma qarin karo dal aadan wad xukumina kuguma mehrin karo wariyuhu. Gabay Yam Yam tiriyey waxa ka mid ahaa ”waagii mudnaantiyo wasiir magac ku faanaa muraayadaha xiran jirey gudbe maal mahaasi” hadda wasiir amar uu bixiyaa uu shaqeeyo ma jiree adigu mowjado ha isku furin oo weliba haku riyoon inaad la mid tahay Maxamed Siyaad Barre oo 1970-yadii jooga. Dowlad kalitalis ah oo saxaafadda caburisa gabalkeed waa dhacay.

WQ: Maxamed Caanageel

caanageel@hotmail.com

Halkaan ka dhageyso Wareysi Madaxa ASOJ

Waagacusub Media: Kulmiyaha Suxufiyiinta Soomaaliyeed

Barnaamijka Tijaabi Codkaaga Part 2 Dhageyso

Halkaan ka akhriso Englishka
Qore By: Elizabeth Withey,
Turjume By: Dahir Abdulle Alasow
Photograph by: Rick MacWilliam,
The Edmonton Journal
Barnaamijka Tijaabi Codkaaga Dhageyso

Dhageyso dabaal dega Gor Gor Media Group

Madaxweyne Geelle oo khudbad dheer jeediyay Halkaan ka dhageyso 

 Murtida iyo Majaajilada Waagacusub Dhageyso

Waagacusub Media