Maxaa loo dilay wariye Siciid Tahliil Axmed? (Faalo uu qoray Saxafiga albashiir)

Maqaal. 05 Fabaury 2009 Waagacusub Media   


Waxa ay aheyd dhacdo naxdin leh murugo iyo argagax badana ku reebtay guud ahaan suxufiyiinta soomaaliyeed falkii ka dhacay suuqa bakaaraha ee lagu dilay mid ka mid ah saxafiyiintii ugu magaca dheeraa dalkeena.

ASOJ blames Al-Shabab on journalist’s killing. Scoure:Waagacusub Media

Wariye siciid Tahliil Axmed oo ahaa khabiir saxaafadeed oo mudo dhowr iyo labaatan sano ah kusoo jiray masraxa saxaafada waxa uu dilkii bareerka ahaa ee loogeystay shalay ka dhigan yahay iyadoo salka laga gooyay oo uu haatan meel aad u yar iska heysto geedkii baxayay ee saxaafada xorta ah.

Marxuum siciid tahliil uma horeeyo saxafi la dilo balse waxa uu kaga duwan yahay qaabka uu udhacay dilkiisa waayo suxufiyiintii hore iyagoo howlahooda wata ama meel iska maraya ayaa gaadmo lagu dili jiray ama qarax loo dhigijiray balse siciid tahliil inta loo yeertay baa hadana iyadoo ay dadkii uyeertay qaarkood lasocdaan si bareer ah loo toogtay.

Yaa dilay Wariye Siciid Tahliil?

Inkastoo oo aan wali si sax ah loo cadeyn dadka dilkan ka danbeeyay isla markaana aanba lasugeen in ay qolo sheegato fal dambiyeedkaasi ayaa hadana mushtamaca soomaaliyeed badankiis waxa ay farta ku godayaan kooxda Alshabaab, waa dhab waana xaqiiq in qofna uusan aqbali karin alshabaab oo la ogyahay awooda ay maanta kuleeyihiin gudaha dalka baa wariyayaal ay saraakiishoodii lasocdaan laba nin oo bastoolado wata inta soo weerareen midna kala dhexbaxeen oo dileen kadibna baxsadeen (waxaa la dhihi karaa ragii alshabaab ee kaartadan soo abaabulay ma aheyn kuwa qibrad u leh howlahaas marka la fiiriyo sida ay fal dambiyeedka ufuliyeen oo ku cadeynaya) dad badan ayaana dhacdada bar bar dhigay in ay uqaab egtahay tii dhowr sano ka hor sidaan oo kale loogu dilay wariye ajnabi ah oo duubanayay banaanbax ka socday fagaaraha tarabuunka oo iyadoo mas'uuliyiintii maxaakiimta iyo ciidamadoodii oo dhooban lagu dhextoogtay aanan la qabay qofkii dilka geystay arintaas oo dadka badankii farta ku fiiqayeen gudahooda.

Miskiin saxaafada soomaalida

Marka war udana ay baahiso waalagu farxaa, marka loo baahdo waaloo yeertaa oo warbaa loodhiibtaa hadana faafisaa, markii ay sii deyso war aan dantooda ku jirina waala dilaa, markii ladilana tacsibaa loo diraa oo waxaa loo sheegaa in laga xunyahay dilka loo geystay.

Dhacdo aan la yaabay

Subaxbaan waxaa mobailkiisa ka wacay mid ka mid wariyayaasha muqdisho ku sugan xiligii ay sida ba'an magaalada uga socdeen dagaaladii udhexeeyay ciidamadii itoobiya iyo muqawimada, wariyahan oo aanan magaciisa sheegeyn waxa uu markaa madaxa wararka ka ahaa mid ka mid ah idaacadaha ugu waaweyn ee muqdisho ku yaala oo aan wararka udiri jiray waxa uuna ahaa nin aad howlkar ah oo badanaa isoo waci jiray wararkana iga qaban jiray, subaxaa anigoo doonaya in aan warsiiyo ayuu markuu iga qabtay taleefanka waxa uu igu yiri bashiiroow idaacad iska daaye xalay gurigeyga uma hooyan oo xaafad kalaa dhuumasho ku joogaa markaan weydiiyay sababtana waxa uu iisheegay in la doonayo inla dilo oo mid ka mid ah kooxaha islaamiyiinta ay doon doonayaan oo dhowr mar oo horana ay taleefanka ugu hanjabeen shalayna ay isagoo ka maqan xarunta idaacada oo qado tagay ay xarunta yimaadeen ayna weydiiyeen shaqaalihii idaacada cabaarna ay ku sugayeen ilinka idaacada isna uu si qarsoodi ah uu taleefanka uga soo wacay mid ka mid ah shaqaalihii xiligaas idaacada kusugnaa oo ku yiri haku soo laaban idaacada waalagugu sugayaaye oo uu qadadii ka cararay.

Wariyahaasi maalintaas ayaa ugu danbeysay idaacada oo uu ka shaqeeyo oo wuu iska dhaafay waxa kaliya ee lagu heystay oo nafsadiisa dhana loo dhaafin rabayna waxa ay aheyd wareysi uu ka qaaday mid ka mid ah mas'uuliyiinta kooxdaasi oo waxa ay yiraahdeen waxaad weydiisay su'aalo adag markaana waxaad kasoo horjeedaa mabda'eena, waxaan runtii subaxaasi aad ula yaabay argagaxa kamuuqday saaxiibkey oo runtii ahaa nin aan ku ogaa geesinimo saa'id oo aan aniga iyo isaga howlo saxaafadeed aan ugasoo wada shaqeynay meelo aad udhib badan oo halisteeda laheyd waxa uuna igu yiri albashiiroow xamar kaad ogeyd maaha hadii amuu madfac kugu dhacaa ama xabad wiifto ah ay kula tagtaa aad ogeyd maanta inta lagu soo waco oo laguu sheego in lagu dilayo baa si bareer ah laguugu imaan oo laguu dilayaa waana sida lagu sameeyay suxufiyiin badan oo lagu laayay muqdisho iyo magaalooyin kale oo soomaaliya ahba oo uu ugu danbeeyo haatan Alle ha unaxariistee Siciid tahliil Axmed.

Maxaa loo bartilmameedsaday wariye Tahliil ?

Waxa uu udhintay Mabda'iisa wanaagsanaa iyo isbadalka muuqda ee ay ku talaabsadeen idaacadaha muqdisho, waa markii ugu horeysay ee inta la xasuusto oo ay qaab mideysan uwada shaqeeyaan idaacadaha muqdisho ayna ku heshiiyaan in haatan xooga lasaaro arimaha danta shacabka iyo dib uheshiisiinta isla markaana aysan idaacaduhu waqti danbe isaga lumin shaqsi nabadiid ah iyo mid doonaya in uu isi soocaan bixiyo isagoo idaacadaha u adeegsanaya in uu ku aflagaadeeyo mas'uul ka sareeya iyo barnaamij ay shacabku la dhacsan yihiin waxa ayna idaacaduhu dalbadeen in qofkii doonaya in uu idaacadaha warsiiyo uu banaanka iskeeno iyadoo barnaamijyada qaarkood aan si live ah loo sii deyneyn oo laduubayo si loo turxaan bixiyo, Arimahaas oo dhan oo ay maalmahan ku diirsadeen dadka soomaaliyeed ee wararka aan dhagaha urooneyn ka maqli jiray idaacadaha waxaa ragii horseedka ka ahaa ka mid ahaa Wariye siciid tahliil axmed waana taas mida loo bartilmaameedsaday iyagoo iska dhaadhiciyay in uu udub dhexaad u yahay saxaafada muqdisho oo ay isku dhex dhaceyso hadii laga siibo isla markaana cabsi ay ugu shaqeynayaan inta kale.

Maxaa la gudboon suxufiyiinta ku harsan gudaha wadanka gaar ahaan muqdisho?.

Suxufiyiinta ku sugan gudaha dalka waxaan usoo jeedinayaa in ay gacmaha isqabsadaan aysana ogolaan talaabooyinka ladoonayo in lagu ogoleysiiyo dilalka lagula kacayo waana in ay howsha sida hagaagsan ee ay hada uwadaan usii wadaan ilaa intey karikaraan iyagoo aan qaadaneyn talaabooyinka sanduleyska ah ee ay wadaan kooxaha qaarkood waana in ay ku shaqeeyaan danta shacabka daalan ee ay diifta ka muuqato.
Kooxaha dilaya saxafiyiinta

Kooxahan kooxdey doonaan ha ahaadeene ha ogaadaan in ay yihiin kuwa jar jaraya qeybo ka mid ah jirkooda isla markaana ay yihiin saxafiyiinta kuwa ka shaqeynaya danta umadda soomaaliyeed iyo dantoodaba niyadana haku hayaan wariyayaasha ay maanta dilayaan in ay yihiin kuwii shacabka u hiilinayay, dhibaatada loo geysanayo sheegayay, baahida heysa soo bandhigayay, Gargaarka loogu dhiibo gaarsiinayay, ayna mudnaayeen in maalin un loo abaal gudo balse uu nasiibkoodu noqday in ay iyaga ugu abaal gudaan xabado ay madaxa iyo laabta kaga garaacaan.


Bashiir Maxamed Warsame (Albashiir)
albashiir88@hotmail.com



Somalia ha noolaato.Halkaan ka dhageyso magacaabista