aduunyada ayaa iska ah mid sida
garaangarta oo kale u wareegata..waa tii uu hore fanaan u
yiri,aduunyada wareeriyo,walwal iyo dhibaatiyo,alla waayo badanaa.!
Runtii Axmed juqraafi waxaa ku
soo kordhay iyo sida uu jacaylka la yaabka leh ee uu u qaaday fani
uu heeryada u saaray waxay ahaayeen tusaalooyinkii uu axmed
geliyay bogga xusuusta qalbigiisa, ..ma ahayn Axmed mid jiljilcan
isla markaana gabdhaha uu waqtiga ku lumiyo umuujiya mar qura
xitaa jacayl.
balse waxa ku soo kordhay,
inkasta oo uu cadaadis badan kala kulamay naftiisa in uu ka reebo
hamiga ka galay fani daahir hadana wuu garwaaqsaday in daawadiisa
ay tahay keliya in uu u bandhigto jacaylkiisa , si ay wax ula
qabato ayna u noqdaan lamaane jacayl wadaag ah.
sidii uu saaxiibkii kula
taliyayba, Axmed juqraafi wuxuu go,aansaday in si kasta ha ku
qaadatee ay lagama maarmaan tahay in fani uu fursad ku raadiyo si
uu ula socodsiiyo waxa maankiisa maalmahan mashquuliyay....wuxuuse
dhinacyo badan ka eegay qaabkii uu ku heli lahaa iyo sida uu ugu
bandhigan lahaa ..fakrado badan oo ay maskaxdiisu u soo gudbisay .
Axmed wuxuu ka qaatay tii ugu
wanaagsaneyd taasoo ahayd in uu ka codasdo in maalin iskuulku
fasax yahay sida khamiista iyo jimcaha ay ugu timaado guriga ..wax
kale oo taa dhaanta ma laha ayuuna Axmed juqraafi isku qanciyay...
goor ay tahay subax arbaco ah
oo ardaydu ay iskuulka u dareerayaan ayuu Axmed juqraafi oo
subaxaas soo yara dhaqsaday uu si lama filaan ah wadada kula
kulmay Fani Daahir oo u degdegeysa iskuulka .
Axmed wuu soo socod boobsiiyay
illaa uu ka soo gaaro wuxuuna hadal ku bilaabay...haye abaayo Fani
ii warran?
“fiican aboowe...”ayay si
xishood ku laranyahay ugu jawaabtay..
Axmed oo hadalka is daba
dhigaya maadaama iskuulkii loo soo dhowaaday ayaa yiri..
“abaayo adoo raalli ah waxaan
kaa codsanayaa in berrito galab aad guriga iigu timaado si aan
kuugu sheego arrin aan in muddo ah kaa qarinayay..”
fani daahir xishood dartiis iyo
iyadoo aan jawaab badan celin karin ayay dantu ku qasabtay in ay
ogolaato codsiga Axmed.
Axmed farxad ayaa hareysay
waxayna la ahayd sida in loogu bishaareeyay jannada...waxay isla
soo socdaanba fani iyo Axmed iskuulkii ayaa la soo gaaray
halkaasoo fasalkii lagu leexday...
Axmed saaxiibkii keyse oo ay
mar kasta isku kursi fadhiisan jireen ayaa boos usii qabtay
halkaas oo uu fadhiistay markii uu yimid..
Axmed wejigiisa waxaa ka
muuqday farxad xad dhaaf ah wuxuuna saaxiibkii keyse ugu
bishaareeyay in ay fani ka ogolaatay in guriga ay ugu tagto......keysana
aad buu usoo dhoweeyay isagoo ku adkeeyay saaxiibkii in uu ka
faa,iideysto fursadaas qaaliga ah illaa ay ka ogolaatana uusan
iska fasixin isla markaana uu adeegsado hadallo soo jiidasho leh...
fani iyadu aad bey u
walwalsaneyd markii ay kursigeeda ku fadhiisatayna waxay dib u
gocatay balantii ay ka qaaday Axmed juqraafi .iydoo ka
qoomameyneysa sida dhaqsiyaha badan ee ay ku ogolaatay in Axmed ay
gurigiisa ugu tagto waxay isweydiineysay ujeedada ka dambeysa
codsiga Axmed ...”alla wixii aan muniiro ka wada hadalnay ayuun
buu koley iigu yeerayaa maxaanse dhahaa..aniga ayayna iskula
catowday .”.
.si kastaba ha ahaatee fani
waxay umuuqatay mid aan marnaba laga badali karin go,aankeeda
sidaa ayay qalinka ku duugtay..
dhanka kale muniiro markii ay
ogaatay in xilka uu ka wareegay isla markaana Axmed qudhiisa uu
fani ka dhameysanayo danta uu ka leeyahay ayay bilowday qorshe ah
sidii ay mar kale u kasban lahayd jacaylkeedii hore...
waxay dareentay in ay si aad ah
ugu baahantahay kaafi isla markaana sidii ay u kala hareenba
niyadeedu ay diiday qof kale...
waxay ogeyd in uu suuqa bakaaraha ku iibiyo dukaan ka dib markii
uu darteed uga baxay iskuulkii ay isla dhigan jireen...
waxay muniiro bilowday in ay ka
baaraan degto sidii ay howshaasi ku bilaabi lahayd ..
waxay talo rogrogtaba waxay goor dambe go,aansatay in ay warqad u
qorto kaafi si ay uga dhaadhciso sida ay wax u dhaceen isla
markaana ay ugu dhiibto gabar ay kaafi ilma adeer yihiin oo ay
deris ahaayeen...
muniiro goor galab ah ayay
qolkeeda hoosta ka soo xiratay waxayna ku dhiirratay qorista
warqad ay u direyso wiilkii kaafi ahaa ee ay xaq darrada jacayl ka
gashay...
waxayna muniiro ku bilowday
warqadeeda...
“waa warqad ka socota qof aad
dunida ugu necebtahay, sida ay ila tahay...waa Muniiro Cumar Aadan,
waana warqad ku socota qof dunida aan ugu jeclahay ...waa Kaafi
Cabdi Axmed.
marka hore salaan ka soo go,day
sambabada neeftiyo,saableydiyo feeraha,iyo sidayaasha unugyada iga
gudoon.
aboowe kaafi waan ka
xishoonayaa in aan ku weydiiyo sida ay xaaladaadu tahay..anigase
teyda hadaan kaaga warramo waa bariga dhexe.
aboowe macaane waa laga yaabaa
in aad isweydiiso sababta igu kaliftay in aan warqadan kuu soo
qoro anigoo og nabsiga aan kaa galay...waan ogahay in aan ku
deyriyay xilligii aad ii baahneyd ee ay ilmadu kaa
qubaneysay..waan la socdaa in aan ahaa qof kaaga baxday ballan
adag ,
aboowe kaafi ma moogi in aan
ahaa qofta aad dunida ugu jecleyd..wax walba waan ogahay aboowe
macaane,maantana waxaa isoo weeraray jacaylkii aan kuugu
cidleeyay oo intuu kaa wareegay soo degay korkeyga misna igu
qasbay in aan si deg deg ah kaalmo kuu weydiisto..
aboowe macaane..marnaba ha
noqon ruux inta gacanta loo soo taagtay wax un ku ridi
waayay..gacaliye kaafi ha ila yaabin waxaan ahay naf runtii dunida
adiga kuugu jecel lagamana yaabo in aan qof kale nolosha la
wadaago xitaa hadadad baryadeyda tixgelin weyso,in aan ifka sidaan
ku joogo illaa aan cimrigeyga ka dhameysanayo mooyee marna iguma
ogid kaafi qofaan adiga ahayn, macaane,horayna uma baran hadana
diyaar uma ihi in aan barto..
sidii uu xiriirkeena u soo
afjarmayba inkasta oo uusan xageyga ka soo afjarmin oo illaa
maalinkaas uu kalgacaylkaad igu abuurtay maskaxdeyda uu ku baaqi
ahaa hadana weli lama aanan hadlin wiil iska daa in aan jacayl la
wadaagee....
aboowe kaafi hadana waxaan kuu
sheegayaa in wax walba ay leeyihiin wax u sabab ah..adiga laga
yaabee in aad isweydiisay sida ay ku dhacday in inaga oo habeen
aan ku ballanay hotel saxafi...oo aan dooneynay in arrimaheenna
halka ay marayaan iyo xiisaha jacayl ee aan isku qabno aan ku kala
boganno aan kaa dalbado in aan kala harno oo xiriirkeenna halkaas
ku ekeyno..ma is tiri weligaa aboowe macaane..muniiro ayaa
hadalladaas kuula imaan doonta oo weligaa maka filatay nafteyda in
ay ku dhihi doonto ereyo ku muraara dillaaciya..
macaane sidii aad ugu hamin
jirtay in aan nolol wadaagno ayaan anigana ugu taamaa weliba
waxaan rajeynayaa hadii aad icafiso in aan labadeenaba wadaagi
doonno kalgacayl dhab ah oo kii hore xitaa ka weyn....
waxaanse kuu sheegayaa in aan kala harno in aanan aniga sabab u
ahayn ee uu walaalkeey axmed juqraafi uu igu amray in aan kaa haro
ka dib markii uu ogaaday in aan isla soconno aniga iyo
adiga..aboowe macaane waadna ogeyd wixii idinka dhexeeyay adiga
iyo walaalkeey sidaa baana kaaga haray ..
inkasta oo aanan hore kuugu
sheegin aniga oo idiin kala qarinayay labadiinna....aboowe macaane
ii garow ...waan ku baryayaa maanta ma heysto maciin..nafteyda wey
ku jeceshahay ee ha noqon wadkeyga ee noqo nolosheyda...ii soo
celi rajadeyda macaane..waan ogahay in aan qalad kaa galay ..ma
qaldame waa ilaah...ee waan kaaga soo laabtay adna ha igu dayan..”.
