Markii uu Axmed juqraafi
soo gaaray gurigii keyse ayaa waxaa ka furay isla keyse oo
doonayay in uu dibadda u soo baxo.
Halkii ayaa leysku
booday.,keyse ayaa la yaabay muuqaalka sirgaxan ee Axmed juqraafi
wuxuuna ku yiri isaga oo qolka u soo jiidaya ….
saaxiib Axmed hadda ayaan kuu soo socday ee qolka ina soo
geli,maxaase maanta ku heysta ii sheeg saaxiib beryahan kuma aan
fahmine,markii qolka la soo galay ayaa Axmed oo salka dhulka la
sii helaya saaxiibkii ugu warceliyay……saaxiib waan yaabanahay
Maanta waxa I heysta ma
aha wax aan ogolaan karo naftuna waxay ku dhowdahay in ay iga fara
baxsato,
Markii uu hadalka intaa
marinayay ayaa keyse oo yaabban ka dhex galay oo yiri:maxaa dhacay
saaxiib ii sheeg ha iga qarinin maxaa ku helay walaahi waan kaa
naxay maanta sida aad u muuqato iyo ishaada halka ay ku taallo,ma
yara dhibaatada ku heysatee waxaad tahay saaxiibkey aan jeclahay
waana kula qeybsanayaa dhibta aad qabtee,
Axmed oo wejiga hoos u
fooraarinaya sida geesi laga lib helay ayaa yiri ……….
Saaxiib keysow arrinta igu
weyn waa gabadha fani ah…
Keyse waxaa ka soo haray
indho un,wuxuuna u holladay in uu u sii dheg taago waxa ka soo
baxaya afka axmed ee maanta ka badalan sidii hore,waxaana keyse
ilaah yaab u keenay markuu axmed ka dhawaajiyay gabadha fani
ah……..
Axmed oo uu codka ka
go,go,ayo caro iyo caloolyow darteed ayaa sii watay hadalkiisii
waxa uuna yiri……….
saaxiib iskuulka unbaan isku aragnaa ee walaahi habeen si fiican
uma seexdo,maalinna ma hergelo,waxaana iigu wacan saaxiib Nafteyda
oo iila timid wax aan ka ogolaan Karin, waxayna igu qasbeysaa qof
aan ii qalmin,taasoo ah gabadha fani bal maxaan isku sheegi karnaa
aniga iyo iyada,maxaa na dhex mari kara aniga oo heysta gabdho
sharaf leh,oo I daba yaacaya oo hadba xiisaha aan isku
badbadalo,maanta miyaan u dulqaadan karaa in gabar qoyskooda aad
ogtahay waxa ay ku suganyihiin oo magaalada iyo iskuulka laga wada
ogyahay in ay noqoto gacalisadeyda, Ee saaxiib bal ka warran
arrintaas.
Keyse yaab iyo
dhabannaheys ayaa ka soo haray wuxuuna la amakaagay saaxiibkii
axmed juqraafi oo uu ku ogaa isla weyni iyo kibir aan caadi ahayn
isla markana marka fasalka lagu jiro quursan jiray fani oo xitaa
markii ay salaanto aan salaanta ka qaadi jirin xaqiraad darteed
mararka qaarna diidi jiray in kursi ku dheggan uu fariisto isagoo
sanka ka qabsan jiray maanta uu si sarbeeb ah ugu dhawaaqo in
naftiisa ay jeclaatay.
Isagoo keyse ka war
celinaya sheekadii uu axmed ula yimid ayaa waxaa uu yiri…
saaxiib axmed dadku haddii ay kaa baqaan aniga saaxiibkaa baan
ahay kaama cabsanayo waan kuu sheegayaa waxaad tahay iyo waxa kugu
haboon,ogow saaxiib dunida waxa ku nool ilaah baa abuurtay ruuxana
dan oo keliya iin uma noqoto gabadhaasi ha u gefin waa gabar
sharaf leh oo ilaah qiimo siiyay waanan ku dhaaran karaa gabar la
mid ihi in aan arag weli gabar asaageed ah waxba kalama
maqna,hadaad danta iyo duruufta ku naceysana maanta hadaad
ladantahay berri laga yaabee in aad hoos tagto ilaah baa ina
xukuma isagaana og waxa uu kala jeedo kala duwanaanta
dadka,fannaan heesaya ayaana yiri…
mar un leysma garab dego dad ma wada sinnaan karo adduun waa si
daba maal.
Waxba yaan saaxiib hadalka
kuugu dheereyne, gabadhaas hadeysan kuu Qalmin naftaada kuguma
dirqiseene u sheego jacaylkaaga kaama diidi doontee….
Axmed baa ku sigtay in
kursiga uu ka sara kaco caro darteed markii la yiri fani u sheego
jacaylkaga.
Wuxuuna la soo booday
isagoo kacaa fadhiisanaya…saaxiib kuuguma imaan inaad wax ii
xukmiso sida qaadiga maxkamadda oo kale ii sheeg sida aan nafteyda
uga reebayo gabadhaas aniga ma rabo in aan wax la wadaago
gabadhaas haba yaraatee welina nacaybka aan u qabo ayaan weli u
qabaa..
Keyse isaga xitaa wuu
xanaaqay wuxuuna ku yiri : wax kale oo aan kuu sheego malaha
saaxiib gaar go,aanka aad gaari karto waxaanse la yaabanahay
naftaada in ay jeceshahay adigana neceb tahay tolow laba miyaad
tihiin.
Waxaad ku hadleyso saaxiib
wax nin weyn ku hadlo mahee is bar qabo.oo gabdha hadaad rabto
adaa og dabcan hadaadan rabinna adaa hadde oge sidaad doonto ka
yeel.
Axmed aad buu markaan
isugu buuqsanyahay waxaana hadba hor imaneysa fani oo qosol
xishood ku dheehanyahay qosleysa iyadoo si qurux badan uga
jawaabeysa su,aal uu macallinku weydiiyay.
Ugu dambeyn wax la is hor
fadhiyaba keyse ayaa axmed u sheegay in galabta banooni uu aadi
rabo,sidaa darteed uu sii baxayo mar kalana ay is arki doonaan
isagoo xitaa ka talo baxay arrintii uu u hayay.
Axmed oo u muuqda sida
ruux madluunsan ayaa ugu jawaabay waayahay saaxiib iska sii tag
aniga xaafadda ayaan aadayaa banooni kuuma racayee waa inoo berri
