Wiilasha sida aadka ah uga helay gabadha fani
ah waxaa ka mid ahaa axmed juqraafi oo isagu ahaa kaabba galaaska
fasalka isla markaana ay walaalo ahaayeen gabadha muniiro ee fani
saaxiibteed ah.
Wuxuuna axmed dareenka caashaq uu ku sii
dhashay markii walaashiis muniiro ay si aad ah uga sheekeyn jirtay
dhaqanka iyo dabeecadaha fani ee la yaabka leh.
Axmed juqraafi wuxuu ahaa wiil ka dhashay
qoys caan ah oo magaalada laga yiqiinay kuna noolaa nolol aad
heer sare u ah,farxad iyo damaashaad iyo Isagoo wax walba oo uu
doono heli karay.
Axmed juqraafi wuxuu ahaa mid gabdhaha sida
dharka oo kale isaga badala oo wuxuu la socday gabdho badan oo
iskuulka dhigtay iyo kuwo uu banaanka ku bartay intaba.weligiisna
gabar uma uusan qaadin jacayl Mana uusan kala jecleyn ee waqtiga
ayuun buu ku dhameysan jiray Halka iyagana ay u hayeen jacayl xad
dhaaf ah axmed wuxuu ahaa mid si aad ah isula weyn,fasalkana si
aad ah ayaa looga yaqaannay dabeecadiisa.
Axmed inkasta oo uu xaqiiqsaday in dhanka
fani markaan laga soo galay hadana ma uusan jecleyn in niyadiisa
ay ku sii fogaato jacaylka fani Maxaa yeelay marna ma uusan
aaminsaneyn in ay dhici karto in isaga oo caynkaas ah sharaf iyo
sumcadna ku leh magaalada uu xiriir la yeesho gabar qoyskoodu ay
ka soo jeedaan dadka tabarta daran isla markaana lawada ogaa in
fani hooyadeed ay cid booyaaso u tahay.
Sidaa daraadeed axmed juqraafi wuxuu is tusay
in lagama maarmaan ay tahay in uu is daba qabto inta ay goori goor
tahay.horaase loo yiri :Caashaqu kulama tashado,e axmed waxaa
marba marka ka dambeysa ku sii kordhayay dareen kalgacayl
xambaarsan oo uu u qabo fani daahir.
Waxayna had iyo jeer niyadiisu ay jecleyd in
halka ay joogto ka dhowaato Isagase wuxuu ka taagnaa
in uu nolosha is dhafinayo hadiiba ay naftiisa sidan ku sii
socoto,wuxuuna hoosta ka xarriiqay in marnaba isaga iyo fani wax
dhex mari karaa aysan jirin.
wuxuu axmed noqday mid markasta naftiisa la
dagaala kana celiya hamiga weyn ee fani daahir ka galay Marka uu
iskuulka joogo aad buu u dhibsadaa xitaa in uu xageeda fiiriyo
isagoo diidan in dareenka nafsaaniga ee ku qasbaya jacaylka fani
uu ku sii kordho.
Maalin maalmaha ka mid ahayd ayaa axmed iyo
walaashii muniira oo guriga wada jooga waxaa dhex martay
sheekadaan……..
Muniira:
Aboowe axmed aniga waxay I dhahaan dadka
hadii aan kula kaftamo walaalkaa waa isla weynyahay oo isku
dabeecad ma tihiin…..
Markii ay hadalka intaas marineyso ayaa uu
axmed ka soo dhexgalay isaga oo yiri : yaaaaaaaaaah..maanta sheeko
ayaadba ii heysaa maxaad mar hore iigu sheegi weysay,yaa waaye
waxa sidaa I dhahay ii sheeg,maxaase ka galay isla weynideyda..
Muniira markii ay aragtay in walaalkeed
xanaaqay ayay sara kacday kuna tiri markaan wax kuu sheegaba
afkaad iga goosaneysaa,anigaa kaa gardaran Waa hadaan markale war
kuu keeno.
Axmed baa garbasaarteeda ku dhegay iyada oo
dooneysa in ay qolka ka baxdo kuna yiri…maya abaayo ii sheeg igana
raalli noqo.
Muniira oo tixgelineysa hadalka walaalkeed
ayaa fadhigii ku laabatay iyadoo sii wadata hadalkeeda ayayna
tiri:aniga marka hore I dhageyso kuma aana dhihin hebel iyo
heblaayo ayaa sidaa ku yiri balse ruux walba ayaa sidaa ku dhaha .
Axmed baa markaa la soo booday isaga oo aan
is ogeyn:
Haa horta fani wey ku jirtaa dadka sidaa iga
aaminsan.
Muniira oo marka fani wax laga sheego ay
meeli damqato ayaa si kulul u tiri:adiga gabadhaas ammaanka sii
hadda wax ay kaa heysato ma jirto,xitaa sheekadaada iima soo qaado
aad beyna kuu tixgelisaa weligeyna ma arag intaan dunida joogay
wax aan gabadhaas ku matalo,waa gabar ilaah uu dabeecad siiyay
waxaanse jeclaan lahaa in ay dumaashidey noqoto…
Markii hadalkii ugu dambeeyay dhegaha axmed
ay ku dheceen ayaa isagoon is ogeyn uu dharbaaxsho kulul si
xooggan ugu dhuftay muniiro.
Gurigu wuxuu ahaa cidlo oo keligood baa
joogaye ,muniira aad bey u qeylisay si halhaleel ah beyna qolkii
uga soo booday.
Axmed juqraafi markii uu arkay qaladka uu
sameeyay ayuu ka soo daba baxay isaga oo isku dayaya in uu raalli
geliyo.wuxuuna yiri….
Aad baan uga xumahay iga raalli noqo abaayo
aad baanse u dhibsaday hadalka aad igu tiri mar dambe ha igu
dhihin.
Muniira dheg jalaq uma aysan siin axmed
waxayna sii wadatay oohinteeda.
Markii in cabaar ah ay ooyeysay ayay iskeed
isaga aamustay waxayna gashay gocosho xusuus leh………
Waxayna
maskaxdeeda is weydiineysay sababta uu walaalkeed u neceb yahay
fani.allow yaa usheega in indhihiisa uu ka
jecelyahay balse uu xaqirayo naftiisana been u sheegayo.
Iyaduse waxay u heysatay in tani ay sii
xoojineyso isla weynida walaalkeed axmed juqraafi,alla walaalkey
ma oga miyaa in dadka ay ilaah xaggiisa ka simanyihiin ayeyna
iskula hadleysay.
Axmed markii uu qolkiisii ku laabtay ayuu
isla hadal galay isaga oo is weydiinaya waxa maalmahan ku soo
kordhay iyo sida uu ku xallin karo,naftiisa harsi iyo hurdo wey
diiday fani la,aanteed wuxuuna markan dambe keenay in uu xitaa
dhibsado gabdhaha uu isku maaweeliyo ee sida uu doono uu ka
helo,sababtoo ah nafta wax aysan rabin laguma qasbi karo
Doorana qoor qabad biyo kuma cabtee,markii
hore niyadda oo faaruq ah ayay gabdhahan isaga dhex mushaaxi
jireen balse imika qalbigii baa buuxsamay isna xirxiray.
Axmed talaa ku cadaatay wax uu sameeyana waa
uu garan waayay,wuuse is celin jiray inta karaankiisa ah.
