(Bilow Iyo Dhamaad waqti baa u dhexeeya)
aad buu u yaabay markii ay soo gaartay warqaddii , dhow jeer
ayuu ku cel celiyay, hadba meel ayuu beegsadaa oo uu ku aqriyaa
niyadda ayaa oloshay, halka uu fadhiyay ayaa la gariirtay ,
dhulkii baa qaadi waayay, mar wuxuu u qaataa waxa ay indhihiisu
qabanayaan in aysan run ahayn, hada garay arrintu in ay tahay
mid run ah.
si deg deg ah ayuu uga soo baxay dukaan weyn oo uu dhex fadhiyay
wuxuuna uga soo tegay wiil ay walaalo ahaayeen una sheegay in uu
soo laaban doono.
ma uusan aqoonin meel uu qabto laakiin ujedadiisu waxay tahay in
uu raadiyo meel deggan oo uu qalbigiisa ku dejiyo kuna fakaro,
sidii uu u socday wuxuu tegay meel banaan ah oo dad dhf dhif ah
ay soo marayaan, markan wuxuu galay isla hadal iyo fakar hadana
mar kale ayuu si ka deggan sidii hore aqris ugu dhaqaaqay
dhambaalkii loo soo qoray.
wuu garowsaday dembiga lagu heystaa in uu yahay mid sax ah,
laakiin horay uusan u ogaanin, micnaha jacaylkana uusan ahayn
sidii uu u fahmay, isagu wuu jecel yahay gabadha laakiin kuma
baraarugsanyen in waxyaabaha ay tabaneyso ay meesha ku jiraan.
hadii uu ku fakari lahaa in uu u jawaabo wuxuu warqadda ku arkay
in uu yahay go,aankeedii ugu dambeeyay uguna horeeyay, yaab
badanaa! bilow iyo dhamaad maxaa isku mar ka wada dhigay miyay
inantu waalantahay? si kastaba ha ahaatee waa in aan ka jawaabaa
buu yiri haku qanacdo amaba ha iska deysee.
wuxuu doontay qalin iyo warqad isna dul saartay, wuxuu la tegay
meelo keymo ah oo si aad ah uga durugsaneyd xaafadaha, wuxuu
bilaabay qoridda jawaabta dhambaalka wuxuuna ku bilaabay....
"gabar yahay , waan kaa qaaday salaantaada qiimaha badan weliba
anigoo hoos fadhiya meel aadan weligaa igu arkin ha u ,oodin in
aan jawaabtan kaaga soo diray halkii aad subax walba igu soo
mari jirtay laakiin waa meel aad u fog oo aan anigu door biday
in aan halkaan kaaga soo jawaabo.
anna mid la mid ah baan kuu soo gudbinayaaye iga gudoon, teeda
kale hadaad tahay qof banii aadam ah ilaahna uu karaameeyay
caqlina u yeelay waa in aad si aad ah u fakartaa, aad la yaabtaa
khalqiga ilaahay iyo sida uu koonkan u abuuray.
kaba sii darane ma la yaabtaa qaabka aan isku barannay? sida aan
isku jeclaannay? waqtiga aan isla soo qaadannay? sida ad iigu
samri jirtay? intaas oo dhan markaad isku eegto waxaa kuu soo
baxaysa ilaah in uu yahay qaadir qadarraduna ay amarkiisu ku
fulaan.
hadaan intaa kaga gudbo tusaalooyinkaasi , ha is oranin marka
hore adigu qaladka ma lihid oo maba jiro banii aadam saliim ah
ilaah baanan dhameystirin, hadaad sidaa garato hadana waxaan kuu
sheegayaa dhambaalkaagii in uu lahaa hal qalad oo weyn kaasoo ah
in aad wax bilowday soona gabagabyesay adigoo aanna u
dhexeysiinin waqti.
ogow bilow iyo dhamaad wax baa u dhexeeya xitaa inta aad ku
dhawaaqeysoo erayga (IYO) waa waqti iyada xitaa laakiin adigu
kuma aadan darin xisaabta, imika hadaad garowsato qaladkaaga waa
la sixi karaa wax walba.
hadii aadan i fahmin weli aan kuu balbalaariyee waxaad ii soo
dirtay dhambaalkaagii ugu horeeyay hadana ima aadan siinin waqti
aan uga soo jawaabo oo waad soo af jartay hadana mowduuca taas
miyay kula waanaagsan tahay?
ogow dhaqankeygii aan kugula dhaqmayay sida aad ogtahay igama
aysan ahayn cadowtooyo, in aan ku dhibo iyo midna in aan kugu
tacdiyo balse waxaa sababay dabci ay raggu leeyihiin taasoo anna
i saameysay hadda ka dib aan kuu sheegee bal fiiri oo arag sida
aad adigu gardarrada u lahayd.
waa midda koowaade, raggu ma jecla gabdhaha in ay si aad ah u
jeclaadaan , wuu ka caajisaa hadii jacaylka laga badbadiyo
taasna waa qaladka koowaad xaqiiqdii ma doonayo in aan wax kuu
qariyo sirta ragga waa waajib in aan ku taabsiiyo weligaa ha
dareensiinin si kasta hadaad u jeceshahay oo tartiibso, micnaha
ma aha in aad ka aamusto laakiin haka badbadin wax walboo buux
dhaafana wey daataane ogow.
tan labaad, waxay ahayd in aad ii sheegto mar hore sida aad
rabtay, iima aadan sheegin aniguna waxaan ahaa qof si aad ah u
doonayay in uu kala barto dabeecadahaaga iyo waxa aad tahay
marka sanooyin inagoo isla soconay hadana aadan i weydiinin
sababta aad keligaa iigu timaado, ii daryeesho jacayl badan ii
sheegato, waxay igu noqotay la ayaab iyo qudhaadu in aadan rabin
in aan noqono dad mustaqbal yeesha oo jacayl wanaagsan wadaaga,
laakiin waad ii imaan jirtay un waadna iga tegi jirtay hadde
sidee baan ku ogaadaa waxa aad qalbiga ka rabto?
sideedaba raggu waxay jecel yihiin in aad u sheegto waxa saxda
ah ee aad ka tabaneyso maanta dow bey ahaan lahayd hadii aad
dhowr jeer wax ii sheegi lahayd laakiin waan ka xumahay waa
maalintii iigu horeysay ee aan kaa helo dhambaal ku aaddan waxa
aad tabaneyso waana maalintii iigu dambeysay in aan kaa qanciyo.
si kasta oo ay noqotaba fahan oo garowso qaladka in aad adiga
lahayd, welina waxaan kula dul taagnahay in aanu wax isla saxno
waxna aas aasno, wax walba waqtigaa keena ee adigu ma keentid,
waayaha aduunkana waa inaad ku qanacdaa, ma waanagsana in la is
eedo un oo aan waxna la iska maqlin hadii eed qof la eedaa
natiijo dhalin lahayd dunida ayaa is badali lahayd oo
malaayiinta khalqiga ah ee ku dul nool ay maalin walba habaaraan
oo ay eedaan markii ay dhibaato la kulmaan oo ay dhahaan( alla
aduunyadaanaa!!!) marka hadii maanta dunida ay hadli lahayd dad
badan kaa wax ka dhaadhicin lahaa weyna qaadan lahayd? maantase
sidaas oo kale in aad iga soo qaado waa wax laga fiican yahay.
waxaan ahay qofka dadka kaaga dhow , marka la fiiriyo jacaylka
aad ii qabto anna sidaas oo kale kaama liito, ee kaalay oo wixii
hore aan ilowno, aan sameyno jawi cusub, aan u gudubno waji hor
leh, aan wajahno is fahan iyo isu calool furnaansho.
gacaliso, fadlan marnaba ha qaadan go,aan qayaxan oo aan waxba
kuu soo kordhin doonin, aniga weligey kuma aanan fakarin ruux
aan adiga ahay waadna ogtahay wax walboo dhacay waa laga soo
laabtaa ii cafi dembiga aan kaa galay ma aanan dooneyn naf aan
jeclahay sidaan in aan u cadaabo, iga raalli noqo maanta kuna
samir wuxuu waayuhu ku baday iyo wuxuu kuula damacsan yahay
hadda ka dib intaba.
waxba kuuma tareyso hadaad iska jarto qeyb jirkaaga ka mid ah
adiga un beyna ku dhibeysaa , anigu kuma goynin kumana diidin ee
si dirqi ah ha isaga key fogeynin waxaan dareemayaa in aanu
nahay dad si dhab ah isku jecel, hal naf wadaaga , fadlan
cadowgeenna ha u iftiimin dulduleello , ha iga quusan hana iga
qaadan go,aan gacaliso hadda ka dib ma rajeynayo qof aan adiga
ahayn mana rabo adna sidaas oo kale marka gaba gabo waa kaas
jawaabta aan ka bixiyay dhambaalkaagii cajiibka ahaa waan
rajeynayaa in aad ku qanacdo .
ogow horay ayaa loo yiri....
jiriyo hadde jooguhuba
aadmigu weys jiirayaan
hadana labo jacayl dhex yaal
sinaba uma kala jarmaan.
Faadumo
Macallin Abuukar( Faadumoruush)
faadumoruush@hotmail.com
