Kutubtii aad soo dhigatay oo dhan markii aad
rogrogtay waxaad meel ciriiri ah baabu dalaaq ka soo heshay: ?Ninku
haddii uu naagta sariirta ku raalli gelin waayo waa ay iska furi
kartaa.?
Haa, halkaas qiil baa ku jira. Nin gurigaba inta badan ka maqani
muxuu raalli gelin karaa? Siraad haddii la raalli gelin lahaa
miyey gogoldhaaf samayn lahayd, oo doob debed fadhiya magangeli
lahyd? Maya.
Markii aad muddo sidaas wax u qorshaynayseen
welise aydaan tallaabo ku dhiirran, fiid fiidadka ka mid ah
ninkii reerka lahaa oo goor xun socdaa waa kan.
*Maalmahan dambe waxaad dareensanayd reerkaaga in
aad dayacday oo aad inta badan ka maqan tahay.
Caawa adiga oo asxaabtaada iskala bulshaynaya ayey taasi
maskaxdaada mar uun ku soo dhacday, oo aad xasuusatay adiga iyo
Siraad in aydaan hoos ahaan isaga war hayn.
Awel sidaas ayaad raalli ku ahayd si aad xorriyad u heshid,
imikase waad kala fogaateen oo xataa laba qof oo isqaba la
idinma moodo.
Awel iyada ayaa ku baraarujin jirtay oo ?xaggee baad ku maqnayd??
iyo ?xaggee baad goortan ka timid?? kaala hor iman jirtay,
beryahanse in aad la joogtid iyo in aad ka maqan tahay ma kala
jecla.
Malaha maqnaanshahaaga ayeyba jeceshahay? Maxay
carruur u dhali wayday? Laba sano ayaad isqabtaan welina
arrintaas kama aydaan wada hadlin.
Waayo? Weydiimo badan baad jawaabo uga baahan tahay. Sababtaas
ayaad caawa goor hore u soo hoyatay.
Xerowgii ganjeelada ma fadhiyo ee mee?
Kitaabbadii dulufka ahaa iyo salligii xumaa waa kuwan halkii
yaal, laakiin isagii mee?
Adeegtadii caawa miyey maqan tahay? Kollay kijida
kama muuqato. Qolka fadhiga ee ay rikoodhka heestu ka shidan
tahay u sii gudub. Laakiin cidi ma joogto.
Siraad ma goortan ayey sariirta jiiftaa? Malaha musqusha ayey ku
jirtaa? Bal sariirta ka eeg.
Halkani waa xaggee? Miyaanu qolkaagii hurdada
ahayn? Miyaad soo ambatay? Horta sariirtu taadii ma aha oo waad
hubtaa.
Abadan! Taadu sidan uma ay foolxumayn! Malaha waaba iyadii? Sow
kuwaa daaqaddii iyo daahii aad taqaannay. Sow kuwaa kabadhkii
iyo katabaankii. Sow kaa dharkaagii qaar.
Sow ma aha? Haa. Haddaa maxaa qaldan? Ninkan
qaawan ee sariirta sii foorora ee la moodo in uu sii
dabbaalanayaa waa kuma? Miyuusan xerowgii xumaa ahayn? Yaa maaha
xeroowgii,waar ileen ibtilo waa maxay gabadha ka hoos
taaheeyso,ninku jab yaraa,waxa ka laalaada maxay ahaayeen.malaha
kani maahi xeroowgii sajuuda dheeraa?
Wallaahi waa qudhiisii. Balaayo Ilaahay kugu rid!
Sow kii wadaadka ahaa goorma ayuu ibtiloobay? Muxuu ku sii
dabbaalanayaa? Qofka hoostiisa ka taahaysaa miyaanay Siraad
ahayn? Siraad? Siraad maxaa xerowga hoos dhigay?
Isaga maxaa dusha ka saaray? Maxaaba halkan isugu
keenay? Miyaad sakhraansan tahay, mise waad riyoonaysaa? Alloow
riyo ka dhig! Malaha waabad waalatay? Maya ma waalane Siraad oo
maqnaanshahaaga dhibsataybaa xeroowga xamaamka isagoo meeyranaya
ka aragtay.
Alloow waalli ka dhig! Acuudu billaahi mina sheydaani rajiim,
bismillaahi raxmaani raxiim! Bal qolka fadhiga ku yara noqo. Bal
indhaha marmar. Bal miyirso.
Bal haddana sariirtii xilka lahayd dib u eeg. Wax ma isbeddeleen?
Haba ka yaabin! Imika ayaaba loogu daran yahay. Rafashadii iyo
reenkii ayaaba la sii kordhiyay.
Aaa,Axmed Yare,ahlu kheyr.haa macaanto,qalbi ,nolosheeydiyaay,shankarooneey,iftiinkii
indhahaay aaa!
Alla madaxa!
Maxaa talo ah? Hub ma sidataa? Maya. Hoh iyo caku!
Bal maxaa ku hub tiray ma dumar baa tahay? Xaggee hub kuugu
dhow? Gacantaada maal.
Maya, nabar qaado. Katabaanka la bood. Maya, wax
dhaama daydayo.
Fadhiga maxaa yaal? Miiska ruqso, ama kursi. Maya, maya, wax
dhaama kijada ka doono
Armay intaa kala kacaan? Weligoodba ha kala
kaceen, yaa daynaya? Waxaas miiska kijada saarani ma mindi baa?
Haa. Iyada qaado. Dib isula rog.
Xerowgii oo feero qaawan oo dhidid ka qubanayaa
sow kan kaa hor yimid.
Muxuu qoonsaday? Mise wuu dan dhammaystay? Dayuuska dayuusku
dhalay, adiga oo aan la hadlin mindida rubadda ka geli: Jug!
Kalxanta iyo qoorta dhexdooda waa adigaa kala helay.
Fulayga fulaygu dhalay, muxuu la cabaadayaa ee kuugu maran yahay
muu wax iska celiyo? Mar kale degdeg ugu celi.
Halkii aad ka siibtay waa kaas dhiig qasabad la furay la moodaa
ka soo booday.
Baga! Nejiska nejisku dhalay mar kale u celi: Shug! Imikana
naaska bidix hoostiisa waa adigaa ka ruubay.
Waa kaa qunyar qunyar hoos kaaga siibtay, ee inta uu dhiig kugu
sii masaxay gondahaaga ku dhacay.
Cabaadkii waa
kaa dhuunyeedhis ku beddelay. Dhakhso ha u dhinto ee mar
saddexaad dhuunta ka geli: Fash! Hooyadii iyo walaashiiba wase,
sow mayd ma aha? Haa.Ma hubtaa? Nacam.
Cimrigeed jabtii magaceed ba?da ahayd iyaduna meeday? Markii aad
xerowga dilaysay waa tii iyada oo qaylinaysa damacday in ay
debedda u cararto ee aad mindida dhiigga leh ku waabisay.
Xaggee bay gashay? Horta debedda uma ay bixin oo waad hubtaa.
Bal gudaha ka eeg. Haa, waa ta
sariirta hoos yaxoobta ee ooyaysa.
Dhidid, dhiig, illin iyo wasakhdii xerowga ayaa giddigeed ka
qoyan. Uf, nacdal baa kugu taal! Wallee maanta markii aad ka
tagtay iyo imika kala nadiifsan. Iyada uun ma aha ee guriga oo
dhami waa faddare.
Mindida dhiiggu ka da?ayo marka aad isla kor
taagtay maxay ku baryootamaysaa? ?Alla ha i dilin! Waan ku
baryayaa ee ha i dilin! Wax kasta oo kale igu samee laakiin ha i
dilin! Waan qaldamay ee i saamax!?
Markii ay sidaa lahayd adigu ciil iyo caloolxumo
ayaad la miyir la ayd.
Sidee bay ku keentay in ay waxaa kugula kacdo? Haddii aanay ku
rabin may kaa tagto? Xerowga xun haddii ay ka heshay may raacdo?
Ma khasab baad ku haysatay sow laba qof oo xorriyad ku wada
jooga ma aydaan ahayn? Maya, adiga ayey doonaysay in ay ku
dulleyso, gurigaagana wasakhayso.
Waxa aad ku miyirsatay iyada oo kugu leh: ?Haddii aad I
saamaxdid maydkan aniga ayaa asturaya oo waxba laguu raacan
maayo.?
Markaas ayaa kuugu horreysay in aad ka fekertid qudhaadu in aad
deldelaad u xidhan tahay.
In aad iyadana dishid iyo in aad toogasho ka badbaaddid ayaad
isku mar ka fekeraysaa.
Haddii aad xasuusta daqiiqado sariirta dib ugu celisid waallidii
ayaa kugu soo noqonaysa, xaggeeda ayaadan mindida ula
dhaqaaqaysaa.
Haddiise aad maydka dhulka daadsan iyo noolahan awoodda daran ee
eegmada quusta ah kugu baryaya fekerka ku soo koobtid waad yar
miyirsanaysaa.
Waxaa maskaxdaada ku soo noqday hadalkeedii ahaa: ?Maydkan aniga
ayaa asturaya oo waxba laguu raacan maayo.? Ma runteed baa?
Sidee ayey u asturaysaa? Qudheeda mar kale ayaad dili kartaa
haddii ay maanta xerowga raqdiisa kaa asturto. Ku talogal la?aan
ayaad u weydiisay:
?Sidee baad u asturaysaa?? La soco taxanaha qeybta 6-aad oo
gelaya jawi naxdin,qaracan,xigmad iyo muusig badan
W/D
Ibraahin Yuusuf
Axmed "Hawd"
Email:Ibraahinhawd@hotmail.com
