Nasrudiin iyo Nimco Farah sheeko dheer ka
dib waxaa lagu balamay in la wadda xiriiro wuxuuna u
sheegay inuu lacag u soo dhigi doono ayna ku heli doonto
sida ugu haboon ee qaab Xawaaleedkii waqtigaas ee ku
qasbayay inuu Nairobi ku xawilo oo ka gadaalna sidaas
taar loogu soo xawilo Muqdisho.
inkastoo Nasrudiin uu dareemaayey qaboow
farabada oo dhacaayey hadana dib ayuu ugu laabtay
jiifkiisa isagoo riyo maalmeed ku joogo xaafadiisii
Waaberi.
Nimco Farah iyadoo farxad iyo rayrayn ka
muuqato ayey dib ugu noqotay xafadey ku noolayd,inta ay
jidka ku sii socotay waxay gudogashay muuqaal xasuuseed
iyo xiligii dowladnimadda, dagaalkii ka danbeeyey,
diiftii iyo dacdaradda uu dalku ka dhaxlay daarihii
burburay,dadkii la dilay iyo dareen la'aanta dablayda
hubaysay ee daadsan wadooyinka degmadda Waberi.
Markii ay guriga tagtay waxay isku
dultuurtay sariirta si ay dib u qooraansato dulucdii war
ee Nasrudiin ay isla darandooriyeen,daqiiqadhii yaraa ee
farxad ahaan u dhigmay saacado,baahina ka yaraa,hal
daqiiqo.
Falanqeyn dheer,sheekadii dhexmartay ,dhankasta
hadii ay u rogtay,hadal walba muraajaceysay kama aysan
dhex helin kalmado huwan hadal dahsoon oo Nasrudiin ku
doonaayo xariirkeeda gabarnimo marka laga reebo tan
walaaltimo.
Nimco Farah,lafteedu waa noole,naf iyo
sheydaan ay la xiriiraan,waxaana qudheeda galay damac
jaceeyl maxaa yeelay waa gabadh aan nolosha guurka
dhadhamin macaan iyo qaraar.
“Way tagtay aroosyo badan,gabdho ay
saaxiib yihiin way
kaga sheekeeyn farqiga u dhaxeeya guurka iyo guur
la’aanta,lafteeda umi maaha oo rag badan way la wad
waday maalmo,waxaase xaqiiqaa inaysan midkoodna ku
qancin,maxaa yeelay Magaaladu waa Madfac dhacaya,Meyd
wado yaal,Mooryaan qori sita,mid Marqaana,maskax kala
fiiga.
Nafteeda ayey la murantay,marba dhanbeey
milicsatay,moowjado badan baa ku furmay,ma hiigaanbaa
hareeyay,madaxeey kalideed ruxday,maankeedu wuxuu
jecleeystay inay muxubada jaceyl,Macaane ila wadaag
tiraa Nasrudiin.
Masalo badan Jaceyl,miyaad moog tahay
inay naftaada maqsuud ku tahay,muraayada eegmadiyo ,hadaan
midig,bidix lahayn,waxaad mohataa rajadu,miyaa la
maleeyn karaa?
Muuqaalka u daa naftoo,marka hore
messeges sii,masawiradana raaciyoo,markaa maskaxdiisa
eeg.
Waxay muusanaawdaba,Nimco waxay hoosta
ka xariiqday inay dhankeeda ka biloowday xiriir
Jaceyl,xaajadu ma foga,xaalkuna ma dhawa,Xamar iyo
Stockholm,xeeb iyo dhul ma wadaagaan,xarbi ahli
Xamar,Sweden xaalad wanaagsan.
Dumar ayey u tahay damaca jaceyl ee
daboolan,hadii dadku weydiiyaan way iska diidaa,oo
dulucdii Caro weelo ayey ka deb iyo dilig qaadataa.
Dadaalka Nasrudiin ma yara,dareen guur
kuma jiro,dagaalo inay dalkii la dageen wuu
ogyahay,biilkana waa u soo diraa,dood kama taagna oo
wuxuu uga dan leeyahay in da' yaraantii ay dadka iska
xigeen,dugsi qur ,aan isla qaateen .
DOOQU WAA BALAAYEE, Nimco waxay af
daboolnaato subaxdii dambe ayey damacday inay
dareenkeeda sheegato,naftaa u diiday,dabcan waa astaan
dumar iyo jaceyl ,dabadeed dadaal dheer waxay horseed u
noqotay inay dad baxaya doon doonto,oo hadiyad ahaan ugu
dirto dulucdii isbedelkeeda dareen iyo sawiro ay ku
leedahay ila daawo,dul iyo dacal iga eeg,hadaan dal
nabadda dirin kugula seexdo,diihaalka ka bogsoodo,soow
daadah maaha?
Wax Raagga rag kuma samaa la yiri,dadkii
ay hadiyadda iyo fariinta ugu dhiibtay dalkii Sweden ma
tegin oo Dubai ayey ku hakadeen,laakiin dabcan Nimco
maalintii waxay la tahay bil.
Nasrudiin 9 bil ka dib 9 :00 Pm fiidnimo
waxaa u bilaabatay sheeko hoosaad iyo is xasuusin
taariikhihii duugoobay ee ay soo wadda mareen qosol,
sheeko, kaftan ka dib Nimco ayaa hadalkii qaadatay oo
tiri Nasrudiinoow ma guursatay?
“Maya Walaashiis ma guursan” ayuu ku
jawaab celiyay.
Waheey wah,waan ku gartay walaal macaan
ee maadaama aadan weli guursan waxaa jeclaysta inaan
aniga iyo adiga aan mustaqbal wadaagno,wada sheekaysano
heer guur maxaa yeelay si kale kuma kala sheekan bogan
karno ee maxay kula tahay” ayey tiri Nimco oo rabta in
ay ogaato wuxuu ka qabo figradda ay soo jeedisay !!
Nasrudiin oo filan waa ay ku noqotay indha'adeega
mutuxan ee Nimco damaceeda daaha uga qaaday ayaa yiri
“haa abaayo waa sax waa arin fiican waxaad nala
jeceshahay waa soo dhaweynayaa” Sheeko ugub jacayl ayaa
labada dhinac la isu jiibiyey,daqiiqado badan ka dib
ayaa la balamay .
Qof waliba iyadoo dhegta ka daalan
dhabarkana ku xambaarsan duco qabo jacayl ayey kala
dareereen ,diihaal badanaa jacayl haduu degdeg iyo
dahsoon u dago daaraha laabta ,hadal waxii dhex maray ,hamuun
qabayaasha jacayl,wuxuu himilo leeyahay ayey dib u
higaadiyeen,markay hoygoodii tageen.
Haa waa runteed,haa waa runtiis, habeenku
dheeraa, hurda ma leh waxaa hareeyay xusuus ,Waa habeen
aan la halmaami karin ebid.
Heeso jacaylbeey sida hobol ku waasheen.inkastoo aysan
war iska hey heerka isku midkaa ee habeenkaa mid ay ka
ahaayeen.
Nimco
oo hurdo gami la’ ayaa maqashay jugta hoobiye ku
habsaday guri ka soo hor jeeday, hal haleel ayey dibadda
uga booday.
Ha heey wareey,hooyo macaan,maku habsaday,haloo
gurmado,heblaayo waa dhimatay,hebel waa dhaawac,halkee
furan saacadaan,halista Mooryaanta iyo hoobiyaha
haboowga!!
la soco qeybta 3-aad ee
Taxanaha Dikaan Jaceyl.
W/Q Dahir Abdulle Alasow
