| |
soomaalida badanaa waa isku
dhaqan, waxaana caado u ah waxyaabo ay u aqoonsadeen in ay
ceebsadaan amaba ay sharaf ka dhigtaan.
inkasta oo soomaalida bulshadeeda kala duwan laga
helayo kuwo aan isku dhaqan ahayn hadana waxaa la oran karaa
waxaa jira dhaqanno iyo caadooyin badan oo ay ka wada siman
yihiin.
waxaana ka mid ah hadaan bulshada u bidhaamiyo
buufiska ay waaldiiinta ka qabaan in guryaha la isku shukaansado
oo caruurtooda ay la yimaadaan guryaha qofka ay doonayaan in
mustaqbal ay wada dhistaan.
waa dhif waalid ogolaanaya in gabadhiisa ay
guriga keensato wiilkii ay calmatay si ay sheekadooda ugu wada
dhameystaan, sidoo kale waa la mid in gabadhu ay ogolaato wiilka
reerkiisa in ay tagto hadii ay tagtana ay ka baqeyso in reerka
wiilka ay u qaataan gabadh aan xishooneyn in ay tahay oo isla
wareegto ah.
hadaba daah waxaa naga saarneyn in loo baahan
yahay mustaqbal in la sameysto guurna uu yahay mid xaqiiq ah oo
carruur lagu tabcado, iyadoo ay sidaa tahay hadana ciyaar ciyaar
guur laguma unko oo wuxuu u baahan yahay in uu soo maro
shukaansi dhex mara gabadha iyo wiilka.
erayga shukaansi si dhab ah marka looga hadlo
ayaa wuxuu noqonayaa labo qof oo si hoose wax isugu sheega oo
keligood go,aansada arrin u goonni ah oo dadka kale ka qarsan
kaasoo aan bulshada dhexdeeda looga wada sheekeysan.
shukaansigaas ayaa ah mid labada qof ee
guurdoonka ahi u saamaxa in ay kaga guul gaaraan hadafkooda guur,
wuxuuna ku wanaagsan yahay shukaansigu meel asturan oo wanaagsan
in lala tiigsado laakiin dhalinta inta badan waxay isku
ballamiyaan meelo aan habooneyn amaba wadooyinka oo ay isla
istaagaan taasna waalidka ayaa ku qasbaya oo iyagu aan ogoleyn
in guryaha leysla yimaado.
hadaba hadii waalidku uusan ogoleyn in gabadhiisa
ay la timaado wiil, wiilkoodana uu la yimaado gabar oo si
asturan ay ugu wada sheekeystaan guryaha maxaa ka dhalan kara
ayaa la is oran karaa?
marka hore, wiilkii wuxuu ku fakarayaa in
gabadhan guryaha saaxiibadiis amaba wadooyinka uu ku ballamiyo
sidaasna ay ku wada socdaan.
waalidka oo gabadhiisa isagoo u soo diray howlo
kale amaba waxbarasho ay ugu maqantahay si hoose wiilkii kula
sheekeysata hadey doontana waalidkii oo aan la ogeyn go,aan la
gaarta .
wiilka iyo gabadha keligood is bartay ee midna
kan kale reerkooda qofna uusan ka aqoon oo suurto gal ay u tahay
una sahlantahay in marka ay rabaan ay kala dhaqaajiyaan oo
hamigii guur halkaas uu ku baaba,o.
run ahaantii lama soo koobi karo dhibaatooyinka
ka dhalan kara, tsuaale ahaan, hadii waalidku uu ogolaan lahaa
in guryaha la isku shukaansado waxaa dhici lahayd wiilka
reerkiisa gabadha in uu soo baro gabadhana ay reerkeeda barto
wiilka ay is doonayaan oo halkaas weji uu isku xushmeeyo .
wiilkii hadii uu doono gabadhan in uu xiriirka u
jaro waxaa ku adkaan lahayd in uu gooyo reerka ay ka dhalatay ee
la baray , hal ruux waad goyn kartaa laakiin banii aadamku wey
ku adagtahay in uu wejiyo badan isku xumeeyo oo uu gooyo,
gabadhiina sidaa si la mid ah hadey wiilkii xumeyn lahayd
reerkiisa ayay xushmeyneysaa labadii qof waxay noqon lahaayeen
labo ay reeraha isku og yihiin.
xitaa wiilka hadii lagu arko gabar kale waxaa
lagu oran lahaa war heblaayo halkee baad geysay? gabadhana waa
la mid.
labadaas qof ee reeraha ay u wada heellan yihiin
waxaa dhici lahayd in mustaqbal wanaagsan ay dhistaan oo raalli
laga wada yahay.
laakiin taas badanaa ma dhacdo oo lama helo
waalid ogol in gabadhiisa si sharaf leh guriga loogu yimaado
isagoo ogsoon in gabadhiisa ay guur u baahan tahay laakiin aan
ku fakarin waxa ka iman kara cadaadiska badan ee la saarayo
gabadha.
waalid badan ayaa waxay caado ka dhigteen in
wiilka aan la ilaalin oo la koontaroolin laakiin gabadha si aad
ah loo ilaaliyo iyadoo la leeyahay sharaf darro ayay inoo
keeneysaa laakiin la dhihi maayo dembi ayay inoo soo jiideysaa
oo wuxuusan ilaah raalli ka ahayn ayay ku kacaysaa.
hadaba iyadoo la ogyahay in wiilku uu gabadhuu
rabo la soo tunto wuxuu doonana ku kaco ayaan looga baqayn oo
aan la oraneyn oo waa gabar oo ceeb bey noo soo jiideysaa halka
gabadha looga baqayo oo keliya ceeb aduun oo gabadhooda oo wecel
qaada aysan rabin.
sow lama dhihi karo aad bey u qaldan yihiin
waalidiinta sidaa sameynaya, banii aadam ayay noqoneysaa in laga
baqay oo ilaah aan laga baqin sida la ogyahayna wiilka iyo
gabadha isku mid bey ilaah agtiisa ka yihiin dembiga ay ku
kacayaan oo uma kala duwana .
hadaba waaldiiinta waxaa la gudboonaan lahaa bal
in ay si barbardhigaan bal kii u wanaagsanaan lahaa in
gabadhooda gurigeeda loogu yimaado oo si sharaf leh loola
sheekeysto iyo in banaanada lala istaago?
waa hubaal in wax badan oo ka qarosoonaa ay ogaan
lahaayeen oo xaqiiqda ay soo taaban lahaayeen.
Faadumo
Macallin Abuukar(FaadumoRuush)
faadumoruush@hotmail.com
Waagacusub Arimaha Bulshada
fatkayare123@hotmail.com
|
|
