Guurkii hore
ee soomaalida reer guuraaga ah waxa yered loo bixin jiray
xoolo aad u badan oon dad badani awoodi Karin.
Ninka dhallinyarta ah ee guur u meerka ahi wuxu had iyo
jeer ka fikiri jiray siduu u heli lahaa adduunkii uu
badhna yered u bixin lahaa badhna reerka ku dhaqan lahaa,
taas baa keeni jirtay in weynaan lagu guursado.
Yeredku wuxu ahaa caqabad keeni jirtay in wiilka loo diido
gabadha arrintaasina waxay ku kallifi jirtay inaanu inanta
reerkooda weydiisane la tago-la baxsado.
Marka uu si
caadi ah u soo doono ee inanta la siiyo markiiba looma
meherin jirin aqal galkuna dhakhso uma dhici jirine dib
buu u soo diyaargaroobi jiray muddo dhowr sano ah inantuna
way sii sugi jirtay.
Nin kale hadduu soo doono lama siin jirine waxa la odhan
jirin nin bay u doonan tahay.
Yeredku wuxu ka mid ahaa waxyaabaha ugu horreeya ee
caqabadda ku ahaa guurka, dhinac kale haddii laga eegana
wuxu gaashaan u ahaa furriinka oo maadaama ninku adduun
badan bixiyey kuma degdegi jirin inuu gabadhiisa si sahlan
u furo, hadday gabadhiisu ku adadkaatana farsamo iyo
dulqaad waayeel buu ku wadi jiray.
Saboolnimada
Saboolnimada
ama wax la’aanta ayaa iyana ahayd caqabad hortaagan
guurkii hore ee soomaalida.
Wiilku hadduu ka dhasho qoys sabool ah waxa ku adkayd inuu
guursado gabadha uu doonayo, weliba xilli ku habboon
maadaama aanu awoodayn inuu bixiyo adduunkii noolka ahaa
ee looga baahnaa inuu bixiyo.
MAXAA LAGU
DAWEYN JIRAY
Inkastoo ay
jireen caqabadahaa hortaagnaa guurku haddana bulshadii
soomaaliyeed ee reer miyiga ahayd waxay lahayd hab ay ku
furdaamiso oo ay kaga gudubto.
Ninku marka uu guursado waxa la siin jiray xoolo uu gaar u
yeesho oo qoyskoodu gooni ugu sooco.
Xoolahaasi waxay ku bilaabmi jireen waxa tafiir ka jooga
neefkii loogu xuddun xidhay, wixii kale ee xoolahaasi uga
go’ana waa la siin jiray.
Waxa la odhan jiray xoolo-gooyo. Intaas waxa dheeraa
in dadka ay qaraabada yihiin u ururiyaan xoolo la yidhaa
dhibaad ama kaalo.
Xoolahaasi waa qaar isagana mustaqbalka looga fadhiyo inuu
wax ka bixiyo marka qof ka mid ah dadkii ay kaalo-wadaagga
ahaayeen uu guursado.
Gabadhuna
marka ay reerkooda u diiqa tagto waxa la soo siin jiray
xoolo la yidhaa yabadh.
Xoolahaas la isa siinayo ee kaalada ama dhibaada,
xoolo-gooyada, iyo yabadhku waxay qoyska cusub ee dhismaya
u noqon jireen waxtar ballaadhan, waxanay ka gargaari
jireen culayskii kaga yimid gabbaatigii iyo yeredkii
inanta, inta soo hadhaana waxay ka dhigan jireen dhaqmaad.
La
soco taxanaha SIRTA GUURKA
Waxaa Qoray Qoraa sare
Hassan Madar
Hargeysa-Somaliland
