Axmed
intii uu jidka sii socday waxaa maskadxiisa ka guuxayay dhowr arrimood
kuwaas oo uu ku doonayay in uu go,aan ku gaaro.
balse
isagoo arrimo badan kala guraya aysanna u soo bixin go,aan rasmi ah
ayaa waxaa u muuqday albaabkii gurigooda oo walaashii ay ka sii
galeyso isla markaana ay isaga gadaal u soo eegeyso si uu usoo galo …
Ka
dibna axmed inta uu soo talaabo dheereeyay ayuu soo galay gurigii ka
dibna wuxuu si toos ah u abaaray qolkiisii gaarka ahaa..
Axmed
sida uu maalintaasi ahaa dareenkiisa xitaa wuu ilaabay in uu iska
bixiyo uniformkii uu iskuulka kala yimid inta uu albabka dhexda ka
xirtay ayuu isku tuuray sariirtiisii .ka dibna fakar dheer galay oo uu
ku gorofeynayo xaaladda deg degga ah ee aan lala ogeyn eek u soo
korortay noloshiisa…
Waa
yaab !
Gabadha uu axmed sidaan isugu mashquulinayo ee isla weyni iyo jacaylna
ay isugu biirsadeen iyadu xitaa uma oga mana weligeed ku fakarin hadal
in uu dhex mari karo iyada iyo wiilkaas axmed ah ..in uu jiro iyo
inkalana wax dan ah kama aysan lahayn ..
Waa
wax mararka qaarkood dhaca in ruux aad jeceshahay oo dhexda iyo dhuuxa
kaaga maran aad hadana qoonsato in xiriir uu idiin dhex maro adigoo
taana u sameynaya caqabado ku hortaagan amaba adigoo ka xishoonaya in
aad burburiso caado ay bulsho meel kuwada nool ay u arkaan sharci
lagama marman ah in lagu dhaqmo..
Axmedna waxaa xirayay dhaqanka gurracan ee ay dadku aaminsanyihiin ee
ah in labo ruux oo bani,aadam ah aysan isugu qalmin kala dheeraanshaha
hantida amaba heerka nolosha,iyo ku kala duwanaashaha waxa ay u arkaan
in haddii lagu dhaqmo ay tahay ceeb.
Axmed
waxaa dhuuntiisa mari weysay in isaga oo qoyskiisa laga wada yaqaanno
magaalada iskuulkana uu caan ka yahay uu la xirto gabar qoyskoodu uu
ka soo jeedo reeraha faqrinimadu ay la dagtay…
Hadana waxaa uu ka kabsan waayay jacaylka sida naxariis darrada ah ugu
beermay wadnihiisa maalinna maalinta ka dambeysa ku sii tarmayay..
Axmed
wax uu talo gedgediyaba wuu ku rafaaday sida uu ka yeeli lahaa waxaa
maankiisa ku soo duxay arrimo badan ..oo uu garan waayay mid uu ka
qaato,waxa ruuxa xukuma waa maskaxda,e
Maskaxda axmed ee u ooman fani daahir waxay soo tufeysay neecaw qabow
oo wadata leyr kalgacayl diirran uu ku laranyahay marka ay u sawiranto
fani daahir ..taasoo si toos ah ugu dhibceysay qeybta jacaylka ee
wadnaha bartamihiisa ku taal .
Axmed
markii uu ka quustay in uu go,an gaaro ayuu isku qanciyay in uu caawa
talo kama dambeys ah uu ka qaato saaxiibkii keyse isaga oo iska
dhaadhiciyay in marka hore uu keyse sharraxaad uga bixiyo..farqiga u
dhexeeya isaga iyo fani daahir si uusan ugula talin go,aan ah in uu
fani xiriir la yeesho..ka dibna uu ku dhaqaaqo waxa uu saaxiibkii kula
taliyo.
Axmed
xitaa maalintas ma uusan cunin qadadii miiska loogu diyaariyay oo maba
uusan soo xusuusan,cabaar ka dib axmed wuxuu isku dayay in uu madaxa
dejiyo oo uu yara gam,o balse muxuu hurdaa waa inankaas aan weligii
dhibaatooyin kuwan la mid ah aan hore u arkine,waxaa ka soo dhici
weysay hurdadii,oo in muddo ah sariirtiisa ayuu iska dul jiifay..
Markii la gaaray galabtii ayuu ka soo baxay qolkii inta uu iska siibay
dharkii iskuulka ayuu soo qubeystay wuxuuna soo fadhiistay daaradda
gurigooda oo ahayd meel ad u qurux badan ayna ka baxayaan ubaxyo qurux
badan waxaana socotay leyr qabow badan oo saxansaxo udgoon leh ay
weheliso..
Goobta uu axmed fadhiyay meel sidaa aan uga fogeyn waxaa fadhisay
muniira oo ay u shidneyd hees cajiib ah oo soo jiidatay dareenka axmed
kuna sii kordhisay caadifad gacaltooyo oo quluubtiisa biya dhigatay..
Waxaad moodaa in heesta ay muujineysay waxa maanka axmed ku sawirnaa..
Fanaanka sida halaasiga leh ugu luqeynayay waxaa uu ahaa xasan aadan
samatar…
Taasoo ahayd………
Sida
meel barwaaqa ah
oo
buuro dhaadheer
webi
baal maraayoo
barbarkana daruuruhu
kaga
beeganyihiinoo
waaguna beryaayoo
bardihii magooliyo
ubaxii gadaal baxay
balanbaalis calamo leh
hadba
laan ka boodaa
adna
ii bidhaantaa………..
Axmed
isaga oo heestii sii macaansanaya ayay ka baxday muniira waxa ay
eegeysay dareenka axmed hadba sida uu isku badalayo…
Waa
yaab!dhibkeeda ayay leedahay hadii ay shaqadaada noqoto in aad daba
taagnaato ruux kale.muniira garteed ayay ahayd oo aabeheed ayaa ku
amray in ay la socoto xaalka walaalkeed ayna u soo tebiso xog rasmi
ah.
Muniira markan waxaa maankeeda ku soo dhibcay in waxa axmed haya uu
yahay jacayl niyadda ayayna ka dhoolla cadeysay sababtoo ah hadda ka
hor ayaa wiil lagu magacaabo kaafi oo dareen jacayl oo baaxad weyn leh
ay u heysay uu si naxariis darro ah uga celiyay walaakeeda xmed
juqraafi .
Kaafi
oo u heellan iyo iyadoo u jeel qabta ay iyadu fulisay amarkii axmed
juqraafi oo walaalkeed ahaa wiilkiiinna sidaa ku xumeysay oo xiriirkii
u jartay.
Muniira weli kama aysan quusan kaafi oo ma jirin ruux kale oo ay la
meel dhigto waxayna inta badan isku samirsiin jirtay in maalin un la
gaarayo xilli walaalkkeed axmed uusan la joogin markaana ay fursadda
ka faa,iideysan doonto oo xiriirkii kaafi iyo iyada dib u soo nooleyn
doonto.
Inkasta oo kaafi uu ka kabtay hilmaamayna jacaylkii muniira wuxuuna
aaminsanaa in ay nabsi ka gashay uuna arki doono maalin ay jilbihiisa
heysato.kaafi lama uusan socon in axmed juqraafi uu ka dambeeyo kala
geyntooda.
muniira waxaa jahawareer ku riday cedda uu walaalkeed jecelyahay………mar
waxay is tiri ma fani baa?
Hadana si degdeg ah ayay uga laabatay oo waxaa u cuntami weysay in
fani iyo walaalkeed oo ay ogtahay sida ay wax uga dhxeyn karaan,sidoo
kale waxay ka war qabtay in walaalkeed axmed uusan dhageysan jirin
heesaha gabdhahana iyaga ay daba ordaan oo uusan weligiis isku
mashquulin gabar xaqa jacaylkana uusan waxba ka aqoon.si kastaba waxay
muniira hoosta kaxariiqday in ay ka sal gaari doonto mar un arrintan.
